所有分集

6位學會成員首次聚會，先要喺學會入面掛上最代表到自己嘅相片，從佢哋所揀嘅相片中觀察男女對於影靚相唔同嘅睇法，仲會即場嘗試擺大家嘅必殺 pose 影相，睇下效果如何。然後6人共同訂立學會守則，從而觀察出男女不同嘅時間觀、儀式感嘅重視度等等…

6位成員第二次聚會將會討論各人嘅睡眠習慣，由姿勢、床單、睡眠必備品，講到睡衣，觀察睡房內嘅男女大不同。男女睡眠姿勢有冇唔同？淨係睇床單款式、整潔度，睇唔睇得出男女分別？女仔特別鍾意攬公仔？女仔睡衣特別講究？透過佢哋嘅討論為大家解開種種迷思…

做運動為健康？為練肌肉？為減肥？終極原因係為呃 like？小至衣著，大至做運動原因、習慣，男女各有不同。

購物慾人皆有之，但買返嚟有冇用就只有自己知。《男女自然觀察學會》一年可能都會有幾次嘅《除舊迎新清貨換物大會》正式開始！除咗可以將物件轉讓外，仲可能從物件中睇到男女不同嘅性格同取向。唔知各位「馬友」會帶咩同大家「開心些牙」呢？

記唔記得對上一次拖住媽媽係幾時？歌仔都有得唱「有媽的孩子像個寶……」但人大咗，就愈嚟愈少同媽媽食飯、傾心事，有時連返屋企飲碗湯都變得奢侈！

個個都會出街，但係個個嘅必備物品都會唔同！點解男仔個袋好似全部都一樣樣？女仔袋咁細又裝到啲咩？ Sica 同 George 會化身成「大小姐與黑執事」檢查各馬友嘅袋，打開呢個神秘宇宙，有垃圾、內衣、充電器！？

馬友們齊齊慶祝 Sica 生日！話明開生日會，梗係要順吓壽星女意，由衣著、食物、慶祝活動，所有環節都係由 Sica 話事！但有啲馬友們似乎好不滿，究竟咩事激親佢哋？男女對「慶祝生日」態度又有咩唔同？有咩環節係生日正日一定要有？

無論男定女，身邊都總有一班好兄弟／好姊妹！佢哋未必成日見，但有起事上嚟一定兩脇插刀。今集會了解大家同 Bro/Sis 嘅相處方式，面對唔同處境，男同女會唔會有唔同嘅取向？平時就算唔見面，大家喺通訊群組又有咩講？

人人都會有爆嘅moment，生活中總有啲嘢係可以一秒激嬲你。Sica同Win Win分別化身「包Si大人」同「公孫Win」，畀機會各位馬友大講自己嬲怒嘅故事，馬友陪審團就幫手評定事件值唔值得嬲！

好多人都有過不堪回首嘅表白失敗經歷，包括A0嘅 Marco。馬友特別開咗個愛情研討會，講下大家 FF過最浪漫嘅表白情節，同分享自己嘅表白經歷，從中了解佢哋嘅愛情觀: 女仔鍾意當面表白定係寫情信？女仔又會唔會特別鍾意被人摸頭同壁咚？

按此報讀：一站式交換技能興趣班，精心挑選馬友技能，為觀眾提供更多神奇、頂級、超卓嘅另類技能及超膠活動！各位馬友將會拎出收藏已久嘅技能向大家展示～讓觀眾盡情享受馬友興趣班既樂趣！適合任何人觀賞，令你哋邊學邊增值自己！

馬友食堂開爐喇！今次有自稱 MakerVille 大胃王嘅 WinWin 化身為食堂靚姑，悉心為一班馬友準備好嘢食， 點知呢班偏食兒童揀飲擇食，要求生蠔、肥牛，但又唔食呢樣嗰樣，搞到 WinWin 好頭痛。

夏天為大地帶嚟……？有冇美腿就唔知，不過汗水少不免！今集馬友齊集，細數夏日玩水消遣嘅難忘事！天時暑熱，萬一屋企冷氣壞咗點算好？網上流傳各種新奇又趣怪嘅消暑妙法，馬友們親身測試，究竟係真心 work？定係伏味濃？今集自有分曉！

同心儀對象第一次約會，點都會想畀個好印象對方，所以著咩衫就好重要！女仔到底係著得性感、可愛定文青受歡迎啲？馬友女子組加上特別嘉賓 YoYo，著返自己最滿意嘅約會服飾出現。佢哋嘅打扮同男子組嘅理想有幾大出入呢？

上集睇完女裝約會服，畀班男子組攻擊到體無完膚﹐今集終於可以大反擊。約會嚟講，男仔就一定唔可以著得好邋遢，但如果太花俏、正式，又可能會嚇親女仔。P1X3L 二子加上特別嘉賓 Manson 著自己最滿意嘅約會服飾！

減肥係好多人嘅終身事業，幾位馬友又有咩方法保持自己嘅理想身型？當你以為佢哋一定會節食、狂做運動，點知原來佢哋好佛系，更加有人話自己食極唔肥，真係難聽過粗口！有人話人到中年，身型點都會發福，如果有得揀，佢哋幾位又會寧願自己肥喺邊？

男仔同女仔嘅觀點與角度喺好多範疇上面都有所不同，咁消費模式又有冇男女之分呢？成日話女仔容易衝動消費、男仔又鍾意買波鞋同玩具，係唔係真呢？

相處咗咁多集，馬友們唔多唔少建立咗啲默契！但如果要佢哋嚟一場 speed dating，喺完全唔知道對方身份嘅情況下，單憑背景、興趣、性格去揀一個心目中嘅理想情人，佢哋又會點揀？

無定向配對大會下集，繼續有 Phoebus 同 Yoyo 客串！上集提到六位參加者初步表態，每人都揀出幾位暫時有興趣嘅對象；今次加插情景題同自由時間，等六位可以更多方面咁互相了解！最後有冇人配對成功？大家係從一而終、抑或突然轉軚？

大家日日都會「出門口」，但會唔會留意自己出門口嘅程序有咩？要幾多時間準備？大部份人都會覺得女仔出門口要化妝、襯衫、執袋，一定用比較多時間，甚至可能要1個鐘頭以上，係唔係真係要咁耐？

正所謂「好事不出門，瘀事傳千里」，出嚟行總會發生幾件瘀爆事件，小則眨吓眼就過咗去，大則傳遍千里令自己樣衰到世界盡頭。

新學年第一堂體育堂，指定動作梗係玩度高磅重。6位成員親身上磅埋尺，喺鏡頭面前公開自己嘅身高體重。同官方嘅數字相比，究竟佢哋高咗定矮咗，肥咗定瘦咗？而佢哋6個人嘅身體柔軟度，拍埋一齊比較嘅差距，簡直係「天與地」嘅分別！

讀書時期其中一樣最令人「心都離一離」嘅事件，就係「突擊檢查校服」！今次由兩位風紀── WinWin 同 Marco 為馬友們檢查校服，違規事項多籮籮。究竟係佢哋本身唔整齊，抑或係校規本身有太多奇怪嘅要求？

有冇人諗過原來「唔准騎馬返學」都係校規嘅一種？你冇睇錯，呢個真係日本一間學校嘅校規嚟！繼上次睇完香港學校嘅奇怪校規，呢集我哋睇埋日本、台灣嘅情況，依然係荒謬到超乎想像！

讀書嘅時候學過咩，可能好多人都已經還返晒畀老師，但係小食部有咩好嘢食，呢啲童年回憶就算過多幾廿年都會記得。作為學生哥嘅洗錢重地，到底馬友們讀書時期嘅小食部有咩名物？

每段感情完結，往往都會留低一堆「蘇州屎」，其中前度送嘅禮物，都係「食之無味，棄之可惜」。今次 Sica 就決定將前度留低嘅「遺物」帶上節目，畀馬友們競投，點知馬友們唔領情之餘，仲想盡辦法推走啲「遺物」！究竟啲「遺物」係咪想像中咁伏？

歌都有得唱「最怕空氣突然安靜」，同人 Social 唔知講咩點算好？六個馬友一齊相處就相當熱鬧，但當佢哋要單獨相處時會唔會「空氣突然安靜」呢？節目組特意安排 Sica &珈其及 Alice&Marco 單對單食飯，觀察佢哋會唔會尷尬。

不時會見到「男生最喜歡的女生髮型」或者「女生最喜歡的男生髮型」排行榜，男同女鍾意嘅髮型風格有咩唔同呢？馬友們今集Set咗自己想挑戰嘅髮型出場，珈其完美演繹崩壞版木村拓哉，George 同 Alice 靠顏值 Carry 超易出事髮型。

「呢件 cutting 女仔著得好睇啲」、「呢隻色男仔著會好奇怪」⋯⋯當中性風愈來愈流行，衣服有冇性別之分？

一個人有幾聰明，似乎係上天注定，但後天嘅訓練同努力，或多或少都可以將智力提升。馬友之中，有人天賦異稟 -- 2歲識背心經，有人默書考試前10分鐘先溫習都滿分過關，但亦有人懵盛盛，甚至派膠搞到人哋輸咗比賽。

Sica 成日話自己讀 Art，今集就畀機會佢 show「Quali」，介紹下自己嘅得意之作。除此之外，佢仲叫埋各位馬友帶自己嘅創作上嚟，等佢鑑賞下、感受下有咩隱藏訊息喺啲作品入面。

適逢就嚟世界盃，當然要踢返兩腳啦！今集馬友會請嚟花式足球界表表者──Lyson 嚟過招！馬友們除咗同 Lyson 傾吓足球經……咪住！佢哋都唔睇波嘅，呢集撐唔撐得住架？

四年一度嘅世界盃即將開鑼，馬友們一齊化身大賽球迷，投入世界盃狂熱氣氛! 對呢班大部分成員都唔多睇波嘅馬友嚟講，邊個球員打邊個球員，都可能要搞一輪先認到。不過就算有睇開波，關於世界盃同足球界嘅冷知識，都唔係隻隻波牛都會識。

今集馬友美妝大挑戰，女仔幫一班男生改頭換面！

上次女仔幫男仔化妝，一班男仔好似唔係幾滿意，「機會嚟喇！飛雲！」

幾年冇出國旅遊，各位馬友都按耐不住心中要去玩嘅熱情。為咗舒緩吓馬友們搔癢難耐嘅心。

「可以hea的話～不會郁～」人人對外都話自己獨立自主，但返到屋企嘅家頭細務，就未必會主動去做。

節目已經播出咗大半年，馬友們成日口輕輕作出約定，趁年尾佢哋就一齊衝出九龍灣「找數」！佢哋曾經講過一齊去女僕咖啡廳體驗，但珈其、Marco、George竟撇甩3個女仔去玩！？

「找數」Road Trip繼續進行中，佢哋六個喺母親節都口響響話帶大家返屋企食飯，下一站就由Marco帶路，請大家去自己屋企開嘅餐廳食烤魚。6個馬友一去到就當正自己屋企咁，老實不客氣叫到成枱嘢食，之後仲叫埋Marco姨媽一齊食。

六人飲飽食醉之後，就去到營火晚會，一齊傾下拍呢個節目嘅難忘回憶。六個馬友轉換認真Mode，分享拍節目嘅後悔時刻、缺席拍攝嘅感受、對大家嘅初印象、以及2023年目標。

每個人都有啲對自己好重要嘅嘢，可能對其他人而言$1都唔值，但對佢嚟講就係無價寶。

農曆新年就到，所有人最關注嘅議題一定係今年又可以逗到幾多利是！平時古靈精怪、活潑可愛又人見人愛嘅馬友們又有幾強吸金力呢？各人分享自己新年嘅吸金力，仲會分享自己逗利是嘅特別方法。

新一年新開始，馬友們2023年運勢到底係好定壞呢？Alice 請嚟老友占星及塔羅師-棍兄，為大家預測來年運勢。棍兄根據佢哋嘅星座命盤推算流年運程，並為佢哋排名，下年六個馬友邊個最好運、最差運氣一目了然。

踏入二月情人節嘅月份，四周圍籠罩住粉紅泡泡，電視節目表上面嘅電影都換晒做愛情片，馬友們都襯住今次機會，請嚟 WinWin 嘅好朋友 KC，一齊扮演台、日、韓經典偶像劇角色，唔止會重演當中嘅經典場面，仲會分享佢哋嘅煲劇習慣...

接近情人節，幾位馬友對於仲係A0嘅 Marco 倍感擔憂，所以決定由「識女仔」開始，分享大家填寫交友APP自我介紹嘅心得，紀正 Marco 「憑實力單身」嘅屬性，同時更加送上「禮物」助佢脫單，製作組更為佢準備咗「活學活用」嘅機會。

2月是戀愛嘅季節，想「出pool」就要視乎你有冇「女友力」啦！三個女馬友一個跳脫、一個女神、一個活潑，加上被網民稱讚超 Girlfriendable 嘅阿冰，個個都唔同路線，邊一個最乎合你心目中嘅「完美女友」呢？

上集3個男馬友做完評審攻擊女生們，今集輪到女馬友反擊，評定佢哋嘅「男友力」。今集三個男馬友會與經常喺影視作品中飾演「別人的男友」嘅黃溢濠比拚，看看誰是「完美男友」！到底係唔係靚仔＝有男友力？A0又係唔係表示必定「男友力」等於零？

每個人都有偶像，而五位馬友們都有個共同偶像，就係珈其！馬友界國際巨星珈其今集缺席，其他馬友們便借機研究如何應援偶像「其其」。由自己如何應援偶像到討論自己嘅粉絲如何應援自己，從中選出最能夠表達對「其其」嘅「愛的方法」。

騷擾無分性別，男女都有機會遭遇到，只要對方嘅行為或者言語令你唔舒服嘅話，就可以構成騷擾，當我哋面對被騷擾嘅時候，最緊要勇敢反抗說不！

後生仔總想快啲長大，結婚都可以係其中一個證明自己成長嘅 Mission！究竟「結婚」對幾位馬友嚟講，係天馬行空嘅想像，定係心思熟慮嘅計劃？佢哋又有冇 「FF」 過自己幾時結婚? 另一半會點樣求婚?

馬友之前影結婚相，體驗一夜長大，但佢哋意想不到，製作組已安排咗成長進階班 - 體驗成為父母！究竟「大唔透」嘅馬友有無諗過生 BB？又自問識唔識得照顧小朋友？

不知不覺，《男女自然觀察學會》已經播放接近一年！究竟呢一年各馬友對大家最真實嘅睇法係點？

上集《一週年企劃：馬友之最 (馬友篇)》珈其就獲得最多星星，有成箱零食做獎勵，但同時珈其同 Sica 亦都得到最多壞熊，需要接受大懲罰！究竟今集幕後篇，相同嘅投票項目，會不會有截然不同嘅賽果？

每個人活著都難免要作出選擇，小至每日著乜衫食乜嘢，大至關乎人生嘅決定，無論重要與否，「選擇」都離唔開我哋，但偏偏有唔少人就係跌入選擇困難嘅深淵，每次要落決定都要花上好一段時間，究竟馬友們係咪選擇困難症患者，又覺得邊個嘅選擇困難最嚴重？

喺馬友心目中，究竟佢哋覺得做男人慘啲，定係做女人辛苦啲？通常大家都會偏幫自己嘅性別，但為咗令大家可以理性思考，製作組安排咗唔同活動，畀大家體驗吓另一性別嘅苦況！

今集嚟個大反轉，由男主持大呻「男人之苦」，原來喺男人角度，佢哋覺得自己唔算好慘，但換個角度，女主持反而覺得男人辛苦之處，就係由細細個已經被教育要堅強、唔準喊，所以好多時要壓抑自己情緒，唔似女人隨時可以有軟弱一面！

有時候我哋做過一啲錯事或者決定，結果傷害到其他人，可能當下已經獲得對方嘅原諒，不過對於自己嘅行為仍然感到後悔，又有可能一直唔知點樣同對方道歉，有見及此今集特登製造機會，畀馬友們告解一番，唔知喺其他人嘅眼中，佢哋嘅「罪孽」值唔值得被寬恕呢？

馬友們咁後生（除咗珈其），究竟有幾多求職經驗呢？佢哋除咗幕前演出，又打過乜工呢？而喺馬友心目中，唔做藝人嘅話，佢哋嘅理想職業又係乜？今集邀請咗強尼飾演「麻煩HR」，即場考馬友們見工時嘅應對執生能力！唔知馬友們有冇辦法面對HR嘅刁難？

喺上集，大家都見識到Sica同Marco嘅見工實力！今集就輪到Win Win、Alice同珈其表演，希望強尼唔會激到嘔血啦！

「馬友森友會」聚集咗一眾愛動物嘅馬友，佢哋將會玩日本人氣動物心理測驗，呢個測驗將會揭露佢哋希望自己畀人嘅印象、人哋對佢哋嘅睇法同自己最真實嘅一面！玩完連馬友都話非常準！ 之後仲會繼續貫徹動物主題，討論馬友最鍾意咩嘢動物？又最想成為乜嘢動物？

仲記唔記得細個嘅時候，一到小息或者放學放假，會同朋友仔玩啲咩? 喺智能手機仲未周圍都係、 低頭族仲未出現嘅年代，一條繩、一條橡筋，甚至淨係手手腳腳，都已經可以玩一大餐。只要身邊有朋友，就唔怕冇嘢好玩。

科技嘅嘢日新月異，而講到今期流行，梗係人工智能/AI。平時喺智能手機裡面，都有人工智能 程式幫你播歌搵路打電話，而家 AI 直頭可以幫你寫文、整圖，同你傾埋計都仲得。

MK文化曾幾何時係香港獨有嘅文化，每個人都曾經被唔同程度嘅MK文化感染，可惜隨住時代同潮流變遷，呢種文化已經不復見，回首重溫亦只留下尷尬嘅味道。

「運氣」呢樣嘢⋯⋯全靠運氣，佢唔係一樣我哋可以掌控到嘅嘢，而成功亦唔係只靠運氣，只係每逢我哋無辦法順利完成一啲事情嘅時候，好容易就會將問題歸咎於「黑仔」，不過喺本學會入面，黑仔並非壞事，越黑仔反而先叫「勝利者」！

有人相信好醜係命生成，認為你的樣子如何，你的日子也必如何；亦有人相信後天可以改變命運，先天不足都可以用其他方法補救。但其實每個人嘅外貌，都有佢可愛同可取嘅地方，只要無缺陷，就已經係幸運嘅一群。

一開返關，好多人都即刻瘋狂去旅行：有人會選擇去歐洲玩返一頭半個月，一次過嚟個長途旅程玩返夠皮；有人會選擇去日本韓國落力掃貨，唔買爆喼都唔捨得走; 有人會揀去東南亞度假，平平哋都可以有高質享受。無論豪洗定窮遊，都有唔同嘅樂趣。

每日喺生活上，我哋都會遇到唔同嘅人同事，唔會樣樣都順風順水，周不時都會試過有食檸檬等等嘅尷尬經歷，馬友們點樣面對被拒絕嘅情況，會即時放棄定係用盡方法說服對方或者迫對方順從？再者被拒絕唔好受，拒絕人會唔會同樣難以啟齒？

「拖延症」喺心理學上係一個故意拖延時間或者推遲工作嘅現象，就算有機會面臨唔好嘅結果，都無辦法擺脫拖延呢個行為模式...

喺成長過程入面，運動神經好嘅人經常都可以成為風頭躉。馬友們個個骨骼精奇﹐佢哋有冇擅長咩運動呢？又有冇咩威水史同大家分享？今集畀機會大家吹噓一下自己嘅運動神經，大講自己當年勇。WinWin除咗跳舞，仲識4種運動，嚇親一眾馬友！

人人都返工，唔通個個都鍾意返工咩？原來真係有人真係鍾意返工㗎！馬友們個個都係大忙人，拍劇、拍戲、拍綜藝…佢哋咁勤力到底係為愛定係為責任呢？今集會用「卑爾根工作成癮量表」評核一下各位馬友到底係唔係工作狂。

品味呢回事，有人認為同美感一樣，都係天生嘅；亦有人相信，財富可以擴闊一個人嘅視野，愈有錢就自然可以接觸得愈多嘢，久而久之就可以提升一個人嘅品味。只要唔好被貧窮限制品味，所有人都可以成為「有 Taste一族」。

女神畀人嘅感覺就好似似近還遠咁，今次George終於可以假借節目之名，去到女神Alice屋企，仲打開埋佢最私密嘅衣櫃！點知一開衣櫃，發現唔止Alice衣櫃精彩，佢細佬都唔輸蝕，衣櫃入面有一系列動物園系列嘅恤衫。

今時今日，點樣先可以成為超人？只要你有勇氣去主動幫人，就無問題啦！WinWin今集化身為贏贏超人，周圍出動做好事！但係除咗WinWin，其他馬友又有冇資格成為呢個「超級好人」（簡稱超人）呢？

《男女自然觀察學會》都已經拍咗咁多集，大家都已經好熟，拍起節目都駕輕就熟！不過製作組一方面感激六位馬友奉獻咗咁多笑料同故事畀大家，另一方面都發現大家都仲有好多進步空間！所謂「一啖砂糖，一啖屎」，製作組首先送上禮物畀大家，提大家毋忘初心。

今集大家繼續拆節目組送畀George同珈其嘅大禮，兩人再搵Serrini一齊學英文。George就請求Serrini幫手改編英文rap詞，珈其就想Serrini教佢講睡前故事畀臻臻。

「撒嬌」向來都係一個高深嘅學問，適當嘅撒嬌會令人覺得可愛加分，相反過分嘅扮可愛就會變成造作，唔知馬友們本身係咪都係撒嬌之人，對於人哋撒嬌又會唔會「過敏」？同時撒嬌賣萌係咪女仔專利，望到男仔咁樣做就會頂唔順？

曾經有人講過女仔對於顏色嘅敏感度係比男仔高，所以單單係唇膏顏色，女仔可能分得出酒紅、玫瑰紅、磚紅等咁多種紅色，而男仔往往只能統稱做「紅色」！有見及此，今集決定同馬友嚟個「顏色敏感度測試」，究竟馬友們覺得自己分辨顏色有幾叻？

一年容易又中秋，嚟到中秋節，又係瘋狂食月餅嘅好時機。舊時一盒月餅何其矜貴，打工仔要死慳死抵供月餅會先有月餅食同送禮，而家嘅月餅唔止易買又多款，個個座底都收到幾盒，食唔晒係意料之內，攞去掉又怕做大嘥鬼…

嗅覺係一種由感官感受嘅知覺，只要嗅覺冇問題嘅話，我哋每日都會聞到唔同嘅氣味，有啲氣味會令你聞完心曠神怡，甚至著迷，相反有啲氣味令你聞完作嘔反胃，避之即吉！

「寫字」呢回事，聽落基本到連幼稚園學生都識，但係喺呢個人人一機在手嘅年代，個個唔係打字就係錄音，執筆忘字都係等閒事，更何況仲要寫得靚啲字。

一班馬友平日job接job，經常食無定時又睡眠不足，操勞過度嘅佢哋，分分鐘已經積落一堆暗病，所以係時候搵個專業嘅中醫師，幫佢哋把一把脈再診一診症，睇吓可以點樣調理，搵返健康嘅身體!

現今都市人尤其後生一輩，經常手機不離手，加上坐姿企姿都唔正確，搞到年紀輕輕就周身痛，同樣作為後生仔嘅馬友們，會唔會已經經歷緊呢度痛嗰度痛嘅慘況？對佢哋嘅生活又有啲咩影響？

市面上充斥住各式各樣嘅消費誘惑，而好多人喺不知不覺間就跌咗入商家嘅「陷阱」，買水果嘅時候畀人呃秤，又或者受減價標籤而影響消費。咁點先可以做個精明消費者？今集馬友們將會左計右計第二件半價定係買五送二平啲？「一斤」係幾多克？

幾位馬友大大話話都喺香港生活咗廿幾三十年，作為土生土長嘅香港人，關於香港嘅嘢佢哋又知幾多呢?

節目喺2022年4月8日首播以嚟，每個星期五從不間斷，至今已經去到第85集，亦都迎嚟終結嘅一日。六位馬友喺節目入面嘅無定向吹水為節目帶嚟唔同嘅驚喜，最後一集六個齊集大回顧﹐重溫各個無聊、有趣、瘋狂話題！