所有分集

膠戰宇宙大爆炸，出現神秘光芒，將6膠靈魂大兜亂，繼而傳送到第一個異度空間！甦醒後嘅6膠發現身處監倉，只可以維持錯配嘅靈魂解謎逃獄，甚至喺盡頭有一場終極嘅審判等緊佢哋⋯⋯而當6膠不斷破關，就越會逼近被困膠戰宇宙嘅真相！

每季必有嘅「辦公室遊戲」回歸！望收工一向係打工仔嘅普世價值，但6膠偏偏有個使到盡嘅老細，想走？先要過到老細嗰三大關。

財閥藏身6膠當中，操控遊戲過程，更對遊戲輸贏進行投資，賺取金幣！6膠懷疑彼此身份，邊玩遊戲邊互相提防。佢哋要爭取成為最終勝利者，因為遊戲結束嘅時候，最多金者就可以取代舊財閥成為新財閥。

魔樹王國正面臨重大危機！隨住魔樹嘅情況越嚟越差，王國嘅存亡亦岌岌可危。為咗防止不幸嘅事件發生，進入咗魔樹王國嘅6膠擔起拯救魔樹嘅責任，合力對付接二連三嘅挑戰！

為咗角逐「最膠新演員」嘅6膠殺入膠氏片場，穿梭三個年代做場好戲，最終帶住榮耀走過第1屆膠像獎頒獎典禮嘅紅地氈！不過，一個受人肯定嘅演員，必須要有演技、對鏡頭敏感、記熟台詞，同埋有豐富嘅電影知識。

千呼萬喚！6膠終於出埠，去到有「小香港」之稱嘅檳城，話晒去馬來西亞點都要袋定一啲馬來語傍身，製作組特意喺6膠飛之前，同佢哋上堂補一補課，但係上上吓堂阿正竟然慘變箭靶？

馬來西亞重點名物！榴槤！貓山王松鼠王黑刺紅蝦葫蘆青皮…淨係名都多都記唔晒，６膠嘅任務就係，分辨佢哋嘅味道！常言道，深入了解一樣嘢嘅最好方法就係拋個身出嚟，我哋準備咗無限榴槤，盡情投入榴槤世界啦，膠人們！秉承膠戰宗旨！最驚嘅嘢就係要面對！

想唔想聽６膠瘋狂尖叫？而家有機會喇！６膠挑戰檳城逃生冒險樂園！得一半人可以逃過大懲罰，決定人選方式就係畫鬼腳！膠人頂硬上，玩盡最刺激遊戲，務求攞到最多鬼腳，先可以倖免於難！６膠玩嘢就睇得多，佢哋認真煮嘢食，你哋又想唔想像到？

玩遊戲玩入最地道市場，６膠親身體驗檳城最地道購物滋味！分成３隊進行shopping任務，有人買到喪心病狂，有人遇小老闆粉絲竟然免全單！最後仲要氹掂檳城評判投自己一票，邊個先係shopping王？膠流團當然要有換裝環節！

嚟到檳城之旅嘅最後一日，6膠繼續由朝玩到晚！親自拍攝食物相片做手牌玩card game，會唔會出牌出得特別有Feel呢？熱帶國家出名陽光與海灘，6膠點可以唔濕下身先！沙灘、泳池遊戲輪住嚟，６膠搏盡爭取Water-free。

結束檳城之旅，返回現實世界⋯⋯並無發生！武林霸主「武家班」掌控住代表6膠現實身份嘅名牌，唯有去踢館將名牌搶到手，先能夠逃出異世界。武家班眾師兄武功蓋世，徒弟仔猛拳快腿，而膠家班連三腳貓功夫都稱唔上，但佢哋勇字當頭連番攻陷死亡塔，再決戰武林之巔，最終同武家班展開一場埋身肉搏，使出奇招妙法嘅名牌守護戰！