所有分集

舞台上嘅COLLAR，又唱又跳夠晒台型；遊戲場上嘅COLLAR，又玩又笑啱晒咀形。但係要佢哋展示有智慧嘅一面，7位成員又有幾醒幾聰明？今次COLLAR唔再係一個團隊嘅身分作戰，而係化身成一個個sharp醒學員，各自利用自己嘅智慧同計謀，喺《COLLAR智慧學園》嘅擂台上，同隊友決一高下。透過一連串嘅智力任務同挑戰，睇吓邊個係真正嘅智慧之鬼，邊個係無可救藥嘅豬隊友！

人人都話一班女仔走埋一齊一定多是非，咁呢隊7人女團到底係唔係面和心不和呢？今集就要透過遊戲搵出COLLAR嘅真面目。

上集Ivy被淘汰，代表佢永久退出「智慧學園」？節目組為保收視，Ivy將會變身成「財神」隆重登場！其餘成員就分成兩隊，進行3個遊戲，測試佢哋嘅「策略」、「記性」同「知識」上嘅能力！

經過前兩集嘅淘汰，淨返嘅5位COLLAR成員將會喺今集進入一個爾虞我詐嘅世界，同之前唔同，今次唔再考驗佢哋嘅團結同默契，相反佢哋需要以獨立個體完成遊戲，透過計謀獲得最後勝利，唔係單靠運氣就能夠保命！

經歷4集嘅智慧考驗，成功消滅COLLAR團魂，將大家分成強者同弱者！勝利者Day、Gao同Candy獲得$1000獎金，任意吃喝玩樂兼早收工。

喺《敗者復活戰》成功復活嘅3人，以及一早已經晉級嘅3人，將再次踏上智慧擂台對決！究竟3個復仇者，對戰「被勝利沖昏頭腦」嘅隊友，邊隊能夠喺兇案偵查遊戲入面獲勝？

經過第一次案情匯報之後，兩隊對自己估中幾多案情嘅要點，都心中有數，而去到最後一次蒐證，兩邊更加出盡渾身解數，企圖阻止對手攞到關鍵嘅證據。佢哋唔止要鬥智慧，仲要鬥奸詐！而喺最終匯報案情嘅時候，竟然出現驚人嘅結果，令淘汰對決出現重大變數⋯

《COLLAR智慧學園》嘅對決去到後半段，已經有兩位成員永久喪失學員資格，今集5位成員將會面對兩個截然不同嘅考驗，一個測試佢哋敏捷度同反應，另一個更加係要求膽識策略兼備！

遊戲進入白熱化階段，喺今集最後4強將要爭取只有2個嘅決賽席位！第一個遊戲 － 〈搶分大作戰〉﹐佢哋要施展決斷力同埋詐欺之術，透過爾虞我詐去搶分！友情定係勝負，佢哋會點揀呢？

《COLLAR智慧學園》終極決戰，對戰雙方實力旗鼓相當：一位喺節目初期，已經被譽為「冠軍大熱門」，之後就更加不負重望，以長勝姿態，過關斬將殺入決賽；另一位雖然因為最初表現失準而被淘汰，但係成功翻生之後就愈戰愈勇，堪稱敗者復活嘅傳奇！